Польскія ВМС застаюцца крытычна важным элементам бяспекі на Балтыцы ва ўмовах расійскіх правакацый, якія узмацняюцца. На гэта звярнуў увагу віцэ-прэм’ер і міністр нацыянальнай абароны Польшчы Уладзіслаў Касіняк-Камыш падчас урачыстасцяў з нагоды Свята Ваенна-марскіх сіл у Свінауйсці:
«Балтыйскае мора стала ўнутраным морам НАТА — з невялікім, але вельмі небяспечным выключэннем. Менавіта гэта і вызначае нашы дзеянні на моры — такія як аперацыі Safe Bay і Baltic Sentry. Ідзе абарона крытычнай інфраструктуры, патруляванне, падтрымка камунікацыі і гандлёвых шляхоў. Няма бяспечнай Балтыкі без ВМС Польшчы, бо вы ўдзельнічаеце ва ўсіх гэтых аперацыях штодня», — падкрэсліў кіраўнік Мінабароны.
Міністр адзначыў, што менавіта маракі з’яўляюцца першай лініяй абароны Польшчы і ўсходняга флангу Паўночнаатлантычнага альянсу. У іх на ўзбраенні ўжо цяпер знаходзяцца караблі і сістэмы назірання, здольныя аператыўна рэагаваць на пагрозы з мора.
Сёлетняе святкаванне мае асабліва сімвалічны характар. Два дні таму польскі ўрад ухваліў рашэнне аб закупцы новых падводных лодак у шведскага канцэрна Saab, які будзе адказваць за іх будаўніцтва і пастаўку. Гэты праект разглядаецца як важны крок да істотнага ўзмацнення абаронных магчымасцяў Польшчы на Балтыцы і далейшага развіцця марскога кампанента сіл НАТА. Пастаўка першай падводнай лодкі запланавана на 2030 г.
iar/эж